Num 15 | MEU | STEP | Iehova ese Mose e hamaoroa, eto,

Numbers 15

Boubou Taravatudia

1 Iehova ese Mose e hamaoroa, eto, 2 Israel taudia ba hereva henidia, baoto: Baina henimui ba noholaia tanona ai ba kau, 3 bena boromakau ta eiava mamoe ta ba hahelaḡaia Iehova ena, ḡole-oho boubouna eiava gwau-hamata boubouna eiava lalo-namo boubouna eiava aria ta boubouna, bonana namo ḡauna Iehova ena; 4 una negana ai boubou baine heni tauna ese flaoa namo-hereana efa ^{▼▼“Efa” bona “Hini” na Heberu taudia edia hahetoho ḡaudia.} ta baine karoaia, karoa gwauta, karoa ta baine abia,bona dehoro hini ta baine karoaia, karoa hani, karoa ta baine abia; bena flaoa bona dehoro baine bulodia. 5 Inuinu boubouna danu bavabia: vine ranuna hini ta ba karoaia, karoa hani, bena karoa ta ba heni; ḡole-oho ḡauna eiava gwau-hamata ḡauna eiava lalo-namo ḡauna ida. 6 Eiava mamoe maruanena ta ba hahelaḡaia, flaoa namo-hereana efa ta ba karoaia, karoagwauta, bena karoa rua bavabi, bona dehoro hini ta ba karoaia, karoa toi, bena karoa ta bavabia; bena flaoa bona dehoro ba bulodia. 7 Inuinu boubouna danu ba heni; vine ranuna hini ta ba karoaia, karoa toi, bena karoa ta bavabia, bonana namo ḡauna Iehova ena. 8 Eiava boromakau maruanena ta bavabia heḡaeḡae, emu ḡole-oho boubouna eiava emu lalo-namo boubouna eiava emu gwau-hamata boubouna eiava emu herohemaino boubouna ai bahalaoa, Iehova ena; 9 boromakau maruanena ida baine heni ḡaudia bini: flaoa namo-hereana efa ta baine karoaia, karoa gwauta, bena karoa toi baineabi, bona dehoro hini ta baine karoaia, karoa rua, bena karoa ta baine abia; bena flaoa bona dehoro baine bulodia. 10 Inuinu boubouna danu ba heni: vine ranuna hini ta ba karoaia, karoa rua, bena karoa ta bavabia, lahi boubouna ai ba halaoa, bonana namo ḡauna Iehova ena.

11 Boromakau mamaruanedia ta ta ida, bona mamoe mamaruanedia ta ta ida, bona mamoe natudia mamaruanedia ta ta ida, bona nani natudia ta ta ida, unu ba heni toma. 12 Mauri ḡaudia hida bavabidia heḡeḡae, unuhohodia mo unu ba heni toma. 13 Israel taudia korikori na una dala amo bae ḡaukara, edia boubou ḡaudia lahi ai bae ato kau negadia ai; unu hetomana bonana namo ḡaudia ai baela, Iehova ena. 14 Bona idau bese tauna eiava bogaragimui ai e noho hedoamu tauna, emui uru iboudiai lalodiai, baine ura bonana namo ḡauna lahi ai baine gabua Iehova ena, ia ese umui o karaiamu heḡereḡerena ma baine karaia. 15 Emui hebou ai taravatu baine tamona, umui emui, bona idau tauna bogaragimui ai e noho hedoamu ena; taravatu tamona, baine mia hanaihanai taravatuna, emui uru iboudiai lalodiai. Umui bona noho-hedoa tauna na heḡereḡere, Iehova vairanai. 16 Taravatu be tamona bona haheḡani be tamona, umui latamui ai bona bogaragimui ai e noho hedoamu tauna latanai.

17 Iehova ese Mose e hamaoroa, eto, 18 Israel taudia ba hereva henidia, baoto: Baina hakaumui vareai tanona ai ba kau 19 bona una tano anina bavani matama negana ai, emui herahia ḡaudia ba dudui isi Iehova vairanai. 20 Emui flaoa matamatana amo ataga ta ba duduia isi, Iehova vairanai, emui uit ikwadina gabuna amo emui herahia ḡauna o duduia isimu heḡereḡerena. 21 Uru iboudiai Ialodiai, emui flaoa matamatana amo emui herahia ḡaudia ba dudui isi, Iehova vairanai.

22 Boma kerere, ini haheḡani iboudiai, Iehova ese Mose vada e henia ḡaudia, basioma badinadia, 23 Iehova ese Mose uduna amo vada e henimui, e heni matama ema bona uru idoidiai lalodiai ma e heni loulou haheḡanidia, 24 ibadinadia ai boma kerere, a hebou taudia asi dibadia: hebou idoinai ese boromakau natuna maruanena ta bae heni, ḡole-oho boubouna ai baehalaoa, bonana namo ḡauna Iehova vairanai. Ena flaoa boubouna bona ena inuinu boubouna danu ia ida bae heni, taravatu heḡereḡerena, bona nani maruanena ta danu bae heni, kara-dika iabi-ohona boubouna. 25 Bena hahelaḡa tauna ese Israel oreana taudia iboudiai daidiai herohemaino karana baine karaia, unu amo edia dika bae hegwau tao; badina be vada e kerere; to edia boubou na Iehova vada e henia, ḡole-oho boubouna bona kara-dikaiabi-ohona boubouna, edia kerere dainai. 26 Bena hebou idoinai, Israel taudia bona bogaragidiai e noho hedoamu taudia na, edia dika bae hegwau tao, badina be iboudiai na una kara dika ese vada e hakereredia.

27 Tau ta baine kara rea, ia ese ena kara-rea iabi-ohona boubouna baineheni, nani hahinena ta, laḡani tamona ḡauna. 28 Hahelaḡa tauna ese kerere tauna ena kara rea dainai herohemaino karana baine karaia, Iehova vairanai; unu amo ena dika baine hegwau tao. 29 Kara rea taravatuna baine tamona, Israel tauna korikori ena bona noho-hedoa tauna ena. 30 A Israel tauna korikori eiava noho-hedoa tauna na hekokoroku dainai baine kerere, ia be Iehova se matauraiamu. Ena bese amo bae negea daure; 31 badina be ia ese Iehova ena hereva vada e dadaraia bona ena taravatu vada e tataia utu, una dainai ia na bae negea daure. Ena kara dika na basine hegwau tao.

Dina Helaḡa Taravatuna

32 Israel taudia na tano ḡaḡaena ai e nohova ai, idia ese tau ta e itaia, dina helaḡa ai au rakuraku e gogodia. 33 Bena au rakuraku igogodia ai e davaria taudia ese e hakaua lao, Mose bona Aaron bona hebou taudia iboudiai vairadiai. 34 Bena idia ese e ḡuia, badina be lalodia asie parara ede.bae karaia toma. 35 Bena Iehova ese Mose e haduaia, eto, Aine mase; hebou taudia iboudiai ese bae hodoa mase, taruha murimurinai. 36 Taunabunai hebou taudia iboudiai ese e hakaua lao, taruha murimurinai, bena idia ese nadi amo e hodoa mase, Iehova ese Mose e haḡania heḡereḡerena.

Helalo Toadia

37 Iehova ese Mose e hereva henia, eto, 38 Israel taudia ba hamaorodia, edia uru iboudiai lalodiai edia dabua rimudia bae kara, edia dabua daigunidia ai; bona daiguni ta ta rimudia ai varo vaiurina ta ta bae turi kau. 39 Bena emui dabua rimudia ba itadia negadia ai Iehova ena haheḡani ba lalodia tao bona ba badinadia; sibomui lalomui bona matamui edia ura basio badinadia, basio halebulebu, 40 a egu haheḡani iboudiai ba lalodia tao bona ba badinadia, bona ba helaḡa, emui Dirava ena. 41 Lau binai Iehova, emui Dirava; Aigupto amo na hakaumui lasi, emui Dirava ai bainala helaoreana. Lau binai Iehova, emui Dirava.